這幾年台語意識愈受著逐家重視，看著有志對鄭宜農致詞連一句台語都無講，感覺淡薄仔憤慨，毋過轉去回顧自1990年頭一改金曲獎到今，差不多全部攏是全程華語致詞說多謝，包含江蕙、黃乙玲、謝金燕佮曹雅雯。
其中，干焦兩位一半以上是用台語致詞：分別是2020年朱海君、2022年江惠儀。
朱海君頭前先用華語講：『我是高雄來的孩子，我雖然是一個客家人，但是我選擇唱台語歌，我不太會講台語』，轉做台語繼續講：「猶毋過我真認真咧學唱台語歌，我無想著今仔日，我會當徛佇這个所在，領著這个獎」。
江惠儀佇中央開始講：「紲落來，我欲用一寡仔時間，講一寡仔心內話，希望濟少有一寡仔人會當理解，我佮意寫台語歌，因為我希望台語會當傳承佮進化」。
佇金曲獎，真有意義的舞台，朱海君講出伊就算是客人，嘛願意努力拍拚來學台語；江惠儀更加大聲講出伊的台語意識，向望台語會當代代湠。
若是親像朱海君佮江惠儀仝款講台語，這是上理想的表現方式，這改鄭宜農攏無講台語是誠可惜，毋過，過去足gâu講台語的sia̋n-pái，嘛是一句台語嘛無講矣。
講台語真重要，具備台語意識嘛真重要，向望鄭宜農會當繼續創作台語歌曲，勇敢來開喙講台語。
原文出處 米粉老師的台語教室