字捌深，人貯屎。
四書五經讀透透，
毋捌黿鼇龜鱉竈。
注音：
字捌深 || jī bat tshim
人貯屎 || lâng té sái。
四書五經讀透透 || sù-su ngóo-king tha̍k thàu-thàu
毋捌黿鼇龜鱉竈 || m̄-bat guân ngôo ku pih tsàu
這兩句，是咧講人干焦知影讀死冊，閣讀無通透，袂曉運用抑是運用毋著所在。是無啥仝氣味的兩句，毋過，意思差不多，運用的狀況有相疊（雖然可能有愛看款場合，分開運用），就共怹下做伙貼出來
這是咱臺語的俗語，四常咧用的生活話語，活跳跳的話語。毋通寫出來了後，看著內面有幾若个筆劃遐濟的字詞，就去予伊嚇著，叫是講學問偌深咧 😊
彼內面，第二句，是咱的先輩，有人專工、抑是嘛有刁工欲製造趣味，揣筆劃較濟的字符（毋過，有指稱足四常、足日常生活的事物的字詞佇內面），鬥做這句有押韻鬥句的話語，來咧詼干焦會曉讀死冊的人。
會當用來剾洗，彼種干焦會曉佇字符、佇枝骨仔面頂，咧認、咧捌，閣想欲用枝骨仔咧展學問的人。結果是，讀死冊讀甲，干焦會曉踮枝骨仔面頂咧踅玲瑯，咧佮人相諍，就當做家己會當攑蠓捽仔坐佇雲頂，不管嘛免知紅塵世事，閣袂曉變竅，毋知按怎運用、袂曉佇日常四常生活當中運用，甚至毋捌人情事理，嘛袂曉處理日常生活當中的人事物佮問題。
嗯，類似意思佮用途的話語，較直接，無鬥句、較無遐藝術的話語，嘛有像講，「讀冊讀對尻川去（抑是，讀對尻脊骿/跤頭趺去）」，種種的講法！
原文出處 臺語社